डिफेन्डिङ च्याम्पियन नेपालले ३७औं संस्करणको बङ्गलादेश एमेच्योर ओपन गल्फ प्रतियोगितामा कमजोर प्रदर्शन गरेको छ। टिम स्पर्धाको प्रमुख दाबेदार नेपालले २८-ओभर ३ सय १६ को नतिजामा पाँचौ स्थानमा प्रतियोगिता सकाएको छ।

गत संस्करणको विजेता नेपाललाई प्रमुख दाबेदारको रूपमा हेरिएको थियो। तर आज सबैभन्दा बढी आश गरिएको र गत संस्करण नेपाललाई स्वर्ण दिलाएको टिमका सदस्य सदभाव आचार्यले १०-ओभर ८२ को खराब प्रदर्शन गरे। उनले ३६ होलको समाप्तीमा १६-ओभर १ सय ६० को स्कोर दर्ज गरे।

राष्ट्रिय टिमबाट पहिलो पटक खेलेका राहुलले आज ५-ओभर ७७ स्कोर गरे। समग्रमा उनले १२-ओभर १ सय ५६ को प्रदर्शन गरे। यो नतिजामा नौ टिम सहभागी प्रतियोगितामा नेपाल पाँचौ भयो। गत संस्करणमा कूल ४-ओभरको स्कोरमा सदभाव र सुबाश तामाङले नेपाललाई स्वर्ण दिलाएका थिए। व्यक्तिगत स्पर्धामा सुबाशले रजत पदक जितेका थिए।

आयोजक बङ्गलादेश बी टिमले समग्रमा १-अन्डर २ सय ८७ सहित स्वर्ण पदक हात पार्यो। स्वर्ण विजेता बङ्गालादेशको टिम भन्दा नेपाल २९ स्ट्रोकले पछाडि रहयो। बङ्गलादेशको ए टिम २९६ सहित दोश्रो हुँदा श्रीलंका १२-ओभर ३०० को स्कोरमा तेश्रो भयो।

व्यक्तिगततर्फ समग्रमा १२-ओभर १ सय ५६ सहित राहुल १६औं र सदभाव १६-ओभर १ सय ६० सहित संयुक्तरुपमा २५ औं स्थानमा रहेका छन। ९७ गल्फर सहभागी प्रतियोगितामा‌ २२-ओभर १ सय ६६ स्कोर गरेका ५० गल्फरले कट बनाएका छन।

टिम स्पर्धामा स्वर्ण पदक विजेता अबु बाकेर सिद्दिक र मोहम्मद शाहब उद्दिन पहिलो र दोश्रो स्थानमा रहेका छन। ईभन-पार ७२ खेलेका अबु कूल १-अण्डर १ सय ४३ सहित शीर्ष स्थानमा उक्लिए। १-अण्डर ७१ खेलेर दिनको उत्कृष्ट कार्ड तयार पारेका शाहब ईभन-पार १ सय ४४ को स्कोरमा दोश्रो स्थानमा उक्लिए। पहिलो दिनका लिडर अस्ट्रेलियाका आरभ डी शाह २-ओभर १४६ स्कोरमा तेश्रो स्थानमा झरे। उनले आज ५-ओभर ७७ खेले।