नेपाल प्रिमियर लिग (एनपिएल) मा सुदूरपश्चिम रोयल्सले उत्कृष्ट सुरूवात गर्दा विराटनगर किंग्स लगातार दुई खेलमा पराजित भएको छ।
मंगलबार कीर्तिपुरस्थित त्रिवि मैदानको पहिलो खेलमा सुदूरपश्चिमले विराटनगरलाई ९० रनले पराजित गर्यो।
सुदूरपश्चिमले दिएको १८३ रनको लक्ष्य पछ्याएको विराटनगरले १६.१ ओभरमा ९२ रनमै अलआउट भयो।
विराटनगरले कुनै बेला सम्हालिएर ब्याटिङ गर्न सकेन। ओपनिङ ब्याटर मार्टिन गप्टिल गोल्डन डकआउट भएसँगै विराटनगरको विकेट जाने क्रम सुरु भएको थियो।
अघिल्लो खेलमा अर्धशतक प्रहार गरेका गप्टिललाई स्कट कुगेलेइनले तेस्रो बलमै बोल्ड गरे। दुई ओभरपछि ओपनर लोकेश बम पनि २ रनमा ब्रान्डन मक्मलेनको बलमा विकेटकिपर विनोद भण्डारीबाट स्टमपिन भए।
निकोलास किर्टोनलाई कुगेलेइनले चौथो ओभरमा ५ रनमा क्याच हुँदा विराटनगरले खराब सुरुवात गरेको थियो।
राजेश पुलामी मगर १५ रनमा रनआउट भए भने बसिर अहमदले २८ बलमा २४ रन जोड्न सके। इस्मत आलम ६ रनमा बोल्ड भएका थिए। बसिर र इस्मत दुवैलाई सुदूरपश्चिमका अभिनास बोहराले एघारौं ओभरमा आउट गरे।
प्रतिश जिसी १ रन र कप्तान सन्दीप लामिछाने ८ रन जोडेर आउट भए। क्रिस सोल ९ रनमा आउट हुँदा अनिल खरेलले नटआउट १० रन बनाए।
आक्रामक ब्याटिङ गरेको सुदूरपश्चिमले बलिङमा पनि उत्कृष्ट प्रदर्शन गर्दा विराटनगर निरिह बन्यो । विराटनगरविरुद्ध फराकिलो जीत निकाल्ने क्रममा अविनाश बोहोरा र स्कटले तीन/तीन विकेट लिए । ब्रान्डन, इशान पाण्डे र सैफ जैबले एक/एक विकेट लिए ।
Discussion about this post