दोस्रो एकदिवसीय क्रिकेटमा नेपालले जिम्बाबे ए माथि ९ विकेटको शानदार जित हात पारेको छ।

शनिबार कीर्तिपुरस्थित त्रिवि क्रिकेट मैदानमा भएको खेलमा नेपालले जिम्बाबेले दिएको ८८ रनको सामान्य लक्ष्य १ विकेटको क्षतिमा ११ ओभर २ बल खेल्दै ८९ रन बनाएर पूरा गरेको हो।

नेपाललाई जित दिलाउने क्रममा सुनिल धमलाले ३८ रन बनाए भने आसिफ शेखले अविजित ३४ रन बनाए। विनोद भण्डारी ४ रनमा अविजित रहे।

यसअघि टस हारेर ब्याटिङ गरेको जिम्बाबेले ३१ ओभर ५ बलमा सबै विकेट गुमाएर ८७ रन बनाएको थियो।

जिम्बाबेलाई सस्तैमा रोक्ने क्रममा नेपालका लागि करण केसी र सोमपाल कामीले समान ३/३ विकेट लिए। त्यस्तै सन्दीप लामिछानेले २ र सागर ढकालले १ विकेट हात पारे।

जिम्बाबेका लागि जोनाथम काम्पबेलले सर्वाधिक २७ रनको पाली खेले । त्यस्तै ब्राड इभान्सले अविजित २० रन बनाए भने केफास झुवाओले १० रनको पाली खेले । अन्य ब्याटरले दोहोर अंकमा रन बनाउन सकेनन्।

यससँगै नेपालले जिम्बाबे एसँगको एक दिवसीय सिरिजमा १–१ को बराबरी गरेको छ। यसअघि शुक्रबार भएको खेलमा नेपाल जिम्बाबे एसँग ३ विकेटले पराजित भएको थियो।

नेपालले अन्तिम एकदिवसीय खेल सोमबार खेल्नेछ।