परराष्ट्रमन्त्री नारायण खड्का र भारतीय विदेशमन्त्री एस जयशंकरबीच द्वीपक्षीय भेटवार्ता भएको छ।परराष्ट्र मन्त्रालयले मंगलबार कोलोम्बोमा दुई मन्त्रीबीच भेट भएको र दुई पक्षीय सम्बन्धका विविध आयामबारे छलफल भएको जनाएको छ। खड्का र जयशंकर बिमस्टेकको मन्त्रिस्तरीय बैठकमा सहभागी हुन कोलम्बो पुगेका हुन्।

जयशंकरले मंगलबार ट्वीट गर्दै रामायण सर्किटलाई अघि बढाउने विषयमा ध्यान दिन छलफलसमेत भएको जानकारी दिएका छन्। बिमेस्टेकको १८ औं बैठकमा भाग लिन पुगेका नेपालका परराष्ट्रमन्त्रीसँग श्रीलंकाको राजधानी कोलम्बोमा भारतीय समकक्षीको भेट भएको हो। भेटमा नेपालका प्रधानमन्त्री शेरबहादुर देउवाको आसन्न भारत भ्रमणबारे कुराकानी भएको परराष्ट्र मन्त्रालयले जनाएको छ।

प्रधानमन्त्री शेरबहादुर देउवा आगामी शुक्रबार तीन दिने औपचारिक भ्रमणका लागि भारत जाँदैछन्। नेपाल र भारतका परराष्ट्र मन्त्रालयले सोमबार दिउँसो एकसाथ भ्रमणबारे जानकारी गराएका थिए। प्रधानमन्त्री नियुक्त भएपछि देउवा पहिलो पटक भारत भ्रमणमा जान लागेका हुन्।