शनिबारदेखि सुरु हुने नेपाल टी–२० लिग फ्रेन्चाइज क्रिकेट प्रतियोगिताको विजेताले ५५ लाख रुपैयाँ पुरस्कार पाउने भएको छ ।

प्रतियोगिता सुरु हुनु अघिल्लो दिन नेपाल टी–२० लिगको कमर्सियल तथा स्ट्राटेजिक साझेदार सेभेन थ्री स्पोर्टसले पुरस्कार रकम सार्वजनिक गरेको हो ।

यसअनुसार प्रतियोगिताको विजेताले ५५ लाख पाउने भएको छ। त्यस्तै दोस्रो हुने टोलीले ३० लाख र तेस्रो हुने टोलीले १० लाख पाउनेछ।

चौथो हुने टोलीले पनि ५ लाख रुपैयाँ हात पार्ने भएको छ। त्यसैगरी प्लेयर अफ दि सिरिजले ५ लाख पाउँदा उत्कृष्ट ब्याट्सम्यान र बलरले समान साढे २ लाख पाउने नेपाल क्रिकेट संघ (क्यान)ले जनाएको छ। त्यस्तै उदीयमान खेलाडीले पनि १ लाख ८० हजार पाउनेछ।

सर्वाधिक पुरस्कार राशीको क्रिकेट प्रतियोगिता काठमाडौंस्थित त्रिवि क्रिकेट मैदानमा हुनलागेको हो। शनिबार काठमाडौं नाइट्स र पोखरा एभेन्जरले उद्घाटन खेलमा प्रतिस्पर्धा गर्नेछन्।