गोकर्ण गल्फ क्लबमा शनिबार भएको पेप्सी ओपन गल्फ प्रतियोगिताको उपाधि टासी छिरिङले जितेका छन् । काउन्ट ब्याकमा सोनम नोर्बु लामासँग बराबरी गरेपछि टासीले २६ स्टेबलफोर्ड अंक जोड्दै ट्रफी जितेका हुन् । वर्षाका कारण प्रतियोगिता १८ होल राउन्डबाट ११ होलमा घटाइएको थियो ।

टासीले अन्तिम ६ होलमा १४ अंक बनाएका थिए, जसमा सोनमलाई काउन्ट ब्याकमा हराउनमा १२ अंक थियो । टासी प्लस दुई ह्यान्डिक्याप गल्फरले बोगी फ्री ११ होल राउन्डमा ६–बर्डी कार्डिङ गरेपछि सबैभन्दा धेरै बर्डी पुरस्कार पनि जिते । सोनम प्रतियोगितामा उपविजेता भए । एक खेलाडी–एक प्रमुख पुरस्कार नियमका कारण वाङ्चेन धोन्डुपले २४ ग्रस अंकका साथ उत्कृष्ट ग्रस अवार्ड पाए ।

सिनियर गल्फर्समा पूर्वप्रधानसेनापति गौरव एसजेबी राणा २५ अंकका साथ विजयी भए । आइस्टिना टण्डन २१ अंकका साथ महिला उपविजेता र रेखा घिमिरे १६ अंकका साथ उपविजेता भइन् । जुनियर गल्फरमा जयवीर आचार्य २५ अंकसहित विजयी भए ।

चेवाङ शेर्पाले सबैभन्दा नजिकको पिन अवार्ड जितेका थिए भने टासी छिरिङले सबैभन्दा लामो ड्राइभको अवार्ड जितेका थिए । वरुण बेभरेज प्रालिले प्रायोजन गरेको प्रतियोगितामा १०० जना खेलाडीले भाग लिएका थिए ।

प्रतियोगिताका विजेताहरूलाई वरुण बेभरेज (नेपाल) प्रालिका मार्केटिङ डेभलपमेन्ट म्यानेजर दुष्यन्त रुपारेलिया, गोकर्ण गल्फ क्लबका अध्यक्ष सुहृद घिमिरे र क्याप्टेन जोसेफ नाथनले पुरस्कार वितरण गरेका थिए ।