नेपालका टेबल टेनिस खेलाडी स्यान्टु श्रेष्ठ पेरिस ओलम्पिक २०२४ का लागि छनोट भएका छन् । दक्षिण एशियाली छनोटमा एकल पुरुषतर्फ पहिलो हुँदै स्यान्टु पेरिस ओलम्पिकमा छनोट हुन सफल भएका हुन् ।

स्यान्टुले बुधबार भएको फाइनल खेलमा नेपालकै संयोग कपालीलाई ४–३ ले पराजित गर्दै ओलम्पिकको यात्रा तय गरेका हुन् । पहिलो सेट ११–७ ले आफ्नो पक्षमा पारेका स्यान्टुले दोस्रो सेट ८–११ ले गुमाउँन पुगे ।

त्यसपछिका दुई सेट ११–७, ११–६ को जित निकालेका स्यान्टुले पाँचौं र छैटौं सेट ८–११, ८–११ ले गुमाउन पुगे । सातौं तथा अन्तिम सेट ११–९ ले आफ्नो पक्षमा पार्दै स्यान्टुले ओलम्पिकमा स्थान पक्का गरे ।योसँगै उनी छनोट पार गरेर ओलम्पिक खेल्ने तेस्रो खेलाडी बनेका छन् । यसअघि दीपक विष्ट र संगिना बैघले छनोट पार गरेर ओलम्पिक खेलेको थिए । टेबल टेनिसतर्फ भने उनी पहिलो नेपाली खेलाडी हुन् ।