नेपाल संगीत उद्योग संघबाट प्रहरीले कागजात बरामद गरेको छ । अनामगरस्थित संघको कार्यालयबाट अनुसन्धानका लागि कागजात संकलन गरिएको मानव बेचविखन ब्युरोका एसएसपी ओम रानाले बताए । रानाले भने, ‘त्यहाँका कर्मचारीकै रोहवरमा अनुसन्धानका लागि कागजात लिन टोली गएको छ ।’

ब्यूरोको टोलीले छापा हानेर लेटर प्याड, हार्ड डिस्क, सीपीयू, माइन्युट बुक बरामद गरेको छ । छापा हान्नु तीन दिनअघि ब्यूरोको टोलीले संघीय उद्योग संघका अध्यक्ष सूर्यबहादुर राना मगरलाई बोलाएर सोधपुछ समेत गरेको थियो । त्यसको तीन दिनपछि छापा हानेर कागजात र सीपीयू समेत प्रहरीले बरामद गरेको छ ।

ब्युरोले कार्यसमिति बैठकका निर्णय, लेटरप्याड र कम्युटर बरामद गरेको छ । नेपाल संगीत उद्योग संघका पदाधीकारीले फर्जी कागजात बनाएर मानिसलाई विदेश पठाउने गरेको सूचनाको आधारमा ब्युरोले त्यसबारे अनुसन्धान सुरु गरेको छ । रानाले संघका अध्यक्ष सुर्य मगरलाई सोधपुछका लागि ब्युरोमा बोलाइएको समेत जानकारी दिए ।