काठमाडौँको टुँडिखेलमा सोमबार (भदौ १०) दिउँसो गौरा पर्वको अवसरमा आयोजित कार्यक्रममा नाराबाजी गर्ने दुई युवक पक्राउ परेका छन्। मंगलबार प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवासमेत उपस्थित कार्यक्रममा युवाहरूले चर्को नाराबाजी गरेका थिए।

काठमाडौं प्रहरीका प्रवक्ता नवराज अधिकारीका अनुसार पक्राउ परेकामाथि अनुसन्धान भइरहेकाले नाम सार्वजनिक गरिएको छैन । प्राप्त फोटो र भिडिओका आधारमा केहीलाई निगरानीमा राखिएकोसमेत प्रहरीले जनाएको छ ।

ओली र देउवाले बोल्ने बेला नाराबाजी गर्नेहरु प्रायःको पहिचान भइसकेको प्रहरीले जनाएको छ । पक्राउ परेकामध्ये एक जना माओवादी कार्यकर्ता छन् भने अर्को राजावादी रहेको पाइएको छ । उनीहरुले ओली र देउवाविरुद्ध आपत्तिजनक नाराबाजीसमेत गरेका थिए ।

गुप्तचर स्रोतका अनुसार कार्यक्रमस्थल एकै ठाउँमा जम्मा भएर होहल्ला र नाराबाजी गर्नेहरुको भिडिओबाट पहिचान गर्दा अधिकांश राजावादी र केही माओवादी कार्यकर्ता पाइएका छन् । एक जना माओवादी कार्यकर्ता मिडियामा समेत नेता चाहिएन भनेर नारा लगाएको बताएको आधारमा समातिएका छन् ।