राजस्व अनुसन्धान विभागले रेडी ट्रेडको सोह्रखुट्टे गोदामबाट बुधबार बरामद गरेको ६६ वटा कार्टुन अधिकांश खोलेको अवस्थामा भेटिएको छ । कार्टुनमा रहेको सामानहरूको साइज, प्याकिङ, डिजाइन सबै गत २ गते बरामद गरिएको सुनको ब्रेक सुजस्तै देखिएको राजस्व स्रोतले जानकारी दिएको छ ।स्रोतका अनुसार रेडी ट्रेडले सुन भित्र्याउने क्रममा ती सामान ल्याएको प्रारम्भिक अनुसन्धानबाट देखिन्छ । ६६ मध्ये करिब एक दर्जन कार्टुनबाहेक सबै खोलेको अवस्थामा रहेको छ । बरामद गरिएको कार्टुनमा सुनको गहना बनाउन प्रयोग हुने साँचो जस्तो देखिने धातुको वस्तु पनि भेटिएको छ । आयात गरेको सुनलाई गहनाका रूपमा दिएर अन्यत्र लैजाने प्रयोजनका लागि यो साँचो ल्याइएको अनुमान गरिएको छ ।

विभागका अनुसार खोलिएका कार्टुन रेडी ट्रेडले पटक–पटक ल्याएको भनिएको सामानमध्येकै हुन सक्ने अनुमान छ । कार्टुनमा भने ‘ब्रेक सु’ नै लेखिएको छ । उक्त कार्टुनमा रहेको सामानको विस्तृत अवस्थाका बारेमा अनुसन्धान भइरहेको छ । विभाग स्रोतले भन्यो, ‘रेडी ट्रेडको नाममा आएका सामान सबै शंकास्पद देखियो ।’

रेडी ट्रेडले दुई महिनामा १९९७ किलो सामान आयात गरेको विमानस्थल भन्सार कार्यालयले जनाएको छ । क्विन्टल सुन बरामद भएको घटनाको छानबिनका क्रममा एक चिनियाँ, एक भारतीय, भन्सार कर्मचारी एजेन्टलगायतका १७ जना पक्राउ परिसकेका छन् । बुधबार बैंक ठगी, सेयर घोटाला र हुन्डीमा विवादित व्यापारी राजेशकुमार अडुकियाको घरमा छापा मारेको थियो ।