डिफेन्डिङ च्याम्पियन बंगलादेशले आइतबार लगातार दोस्रो पल्ट वुमेन्स साफ च्याम्पियनसिपको फाइनल यात्रा तय गरेको छ । दशरथ रंगशालामा भएको पहिलो सेमिफाइनलमा बंगलादेशले भुटानलाई सजिलै ७–१ ले हरायो ।

बंगलादेश दक्षिण एसियाली महिला फुटबलको सबैभन्दा ठूलो प्रतियोगिताको फाइनलमा प्रवेश गरेको समग्रमा तेस्रो पल्ट हो । बंगलादेशले पछिल्लो पल्ट २०२२ को सेमिफाइनलमा पनि भुटानलाई पराजित गरेको थियो । हारसँगै भुटान भने प्रतियोगिताबाट बाहिरिएको छ ।

बंगलादेशको जितमा तोहुरा खातुनले ह्याट्रिक गरिन् । उनले १२, ३५ र ५८ औं मिनेटमा गोल गरिन् । कप्तान सविना खातुनले २६ र ३७ औं मिनेटमा दुई गोल गरिन् । रितु पोर्ना चम्काले सातौं मिनेटमा गोलको खाता खोलेकी थिइन् ।

खेलको ७२ औं मिनेटमा सिउली अजिमले सातौं गोल गरिन् । भुटानका तर्फबाट डेकी ल्हाजोमले ४१ औं मिनेटमा एक गोल फर्काइन् । प्रतियोगितामा उनको यो आठौं व्यक्तिगत गोल हो र उनी सर्वाधिक गोल गर्ने खेलाडी सूचीको शीर्षमा छिन् ।