अदालतको आदेशमा चार बर्षपछि आइतबार महोत्तरीको एक वडामा भएको स्थानीय तह निर्वाचन २०७४ को मतगणनामा मतपरिणाम उल्टिएको छ ।

उच्च अदालत जनकपुरधाम र सर्वोच्च अदालतले दिएको आदेश बमोजिम महोत्तरीको मनरासिस्वा नगरपालिका–१० को पुनः मतगणना हुँदा पहिले पराजित उम्मेदवार विजयी भएका हुन् ।

त्यसबेला मतगणना गर्दा दुई उम्मेदवारको बराबर मत आएको भनिएको थियो।

तर यसबारे उच्च अदालत जनकपुरमा मुद्दा परेको थियो। उच्च अदालत जनकपुरको आदेशपछि आज गरिएको मतगणनामा मनरासिस्वा नगरपालिका वडा नम्बर १० मा २ मतले रमेश राय वडाध्यक्ष विजयी भएको पाइएको छ।

यसअघि निर्वाचन आयोगले यो वडामा नेपाली कांग्रेसका उम्मेदवार अरुण चौधरी विजयी भएको घोषणा गरेको थियो । तर आइतबार भएको पुन मतगणनामा स्वतन्त्र उम्मेदवार रमेश राय विजयी भएका हुन् ।

४ वर्षअघि स्थानीय तहको निर्वाचनका क्रममा दुबै उम्मेदवारले २६७ मत ल्याएको भन्दै निर्वाचन आयोगले गोला प्रथाबाट चौधरी निर्वाचित भएको घोषणा गरेको थियो ।

तर पुनः मतगणनाको माग गर्दै स्वतन्त्र उम्मेदवार रमेश रायले उच्च अदालत जनकपुरधाममा मुद्दा दिएका थिए । उच्च अदालतले २१ असार २०७५ मा पुनः मतगणना गर्ने आदेश दिएपनि निर्वाचित भएका चौधरीले यो निर्णयविरुद्ध सर्वाेच्च अदालतमा निवेदन दिएका थिए ।

वडाध्यक्षमा विजयी भएका रायका अनुसार मतगणनाको अन्तिम चरणमा आएर निर्वाचिन अधिकृतको मिलिमतोमा जेनेरेटर बन्द गरेर धाँधली गरिएको थियो।

‘मतगणना सकिनै लागेको बेला तेल सकियो, समस्या आयो भनेर २/३ पटक जेनेरेटरको लाइन काटियो। अँध्यारोमा मतगणनामा खटिएका अधिकृतले बदर भएर बाहिर राखिएको तीन वटा मतपत्र निकालेर रुख छापमा सदर गरिदिए,’ त्यसबेलाको घटना स्मरण गर्दै रायले भने।

त्यतिखेर धाँधली भएको भन्दै विरोध गरी मतगणनाका लागि पटक–पटक आग्रह गरे पनि निर्वाचन अधिकृतले नमानेको उनको भनाइ छ।

मतगणनामा धाँधली भएको भन्दै रायले उच्च दालतमा रिट दायर गरेका थिए। पुन: मतगणना गर्न आदेश जारी गरिपाउँ भन्दै मुख्य निर्वाचन अधिकृतको कार्यालय जलेश्वरविरूद्ध उनले हालेको रिटमा सुनुवाइ गर्दै उच्चअदालत जनकपुरले पुनः मतगणना गर्न आदेश दिएको थियो।

सर्वाेच्चको ६ चैत २०७७ को आदेशबाट उच्च अदालतको आदेश सदर गरेको थियो । सर्वोच्चको आदेश अनुसार पुनः गणना हुँदा पहिला भएको गणना भन्दा फरक नतिजा आएको देखिएको जिल्ला निर्वाचन कार्यालयका प्रमुख दिवाकर भुजेलले जानकारी दिए ।

उच्च अदालतका रजिष्ट्रार र आफ्नो उपस्थितिमा भएको पुनः गणनामा नेपाली कांग्रेसका उम्मेदवार चौधरीले २ सय ६६ र पराजित भएका रायले २ सय ६८ मत पाएको देखिएको भुजेलले बताए । अब पुनः गणनाको परिणाम न्यायाधीश समक्ष पेश हुने र त्यसपछि पद परिवर्तनको आदेश त्यहींबाट आउने भुजेलले बताए ।

महोत्तरीको मनरासिस्वा नगरपालिका १० को वडाध्यक्षमा विजयी भएका रमेश रायले देशमा न्याय अझै नमरेको प्रतिक्रिया दिएका छन्। ढिलै भए पनि आफूले न्याय पाएको उनको भनाइ छ।

२०७४ साल असोज २ गते सम्पन्न भएको स्थानीय तह निर्वाचनमा गोलाप्रथा गरी पराजित घोषणा गरिएका उनले पैसा खाएर अगामी चुनावमा धाँधली गर्नेका लागि ठूलो सबक रहेको बताए।

‘चुनावमा पैसा खाएर धेरै निर्वाचन अधिकृतले पक्षविपक्ष गर्न थाल्छन्। यो परिणामले उनीहरु पनि अब डराउनेछ,’ उनले भने।

स्वतन्त्र उम्मेदवारी दिएर चार वर्षपछि निर्वाचित घोषणा गरिएका उनी अगामी निर्वाचनमा जनता समाजवादी पार्टीबाट प्रदेश सभा निर्वाचनमा आकांक्षी रहेको बताए।

रायलाई निर्वाचित भएका चौधरीभन्दा बढी मत आएपछि अदालत प्राङ्णमै उनका समर्थकहरुले उनलाई माला लगाइदिएका छन् ।

प्रतिक्रिया

सम्बन्धित खवर

ताजा समाचार

लोकप्रिय