नेकपा एमालेका अध्यक्ष तथा झापा क्षेत्र नम्बर ५ का प्रतिनिधि सभा सदस्य उम्मेदवार केपी शर्मा ओलीले आफ्नो विगतको चुनावी रणनीति बदलेका छन् ।

यसअघिका निर्वाचनमा केही र निश्चित स्थानमा सभा र मतदाता भेटघाट गरेर चुनाव जित्दै आएका ओलीले यसपटक भने आफ्नो चुनावी रणनीति बदल्दै सबै मतादातासँग प्रत्यक्ष संवाद र भेटघाट गर्ने रणनीति अपनाएका हुन् ।

बदलिएको चुनावी रणनीति अन्तर्गत ओली सकभर आफैँ मतदाताका घर र टोलमा पुग्ने र गुनासा सुन्ने योजनामा छन् । उनले आफू पुग्न नसकेका मतदाताका घरमा निकटका कार्यकर्ता खटाएर उनीहरूका गुनासा सुन्ने र टिपोट गर्न पनि लगाएका छन् ।

झापा ५ का उम्मेदवारहरूमध्ये मुख्यगरी ओली र रास्वपाका वरिष्ठ नेता बालेन शाहबिच प्रतिस्पर्धा हुने आकलन गरिएको छ । बालेनको बढ्दो क्रेजसँगै ओलीलाई झापामा चुनाव जित्न कठिन हुने विश्लेषण भइरहेका बेला ओलीले पनि आफ्नो पुरानो रणनीति बदलेर आफै मतदातामाझ पुग्ने प्रयासमा छन् ।