काठमाडौंका ११ पालिकामध्ये ७ मा एमाले, ३ मा कांग्रेस र महानगरमा बालेन्द्रको अग्रता

245
VIEWS

। काठमाडौंका ११ मध्ये सात स्थानीय तहमा नेकपा एमालेले अग्रता लिएको छ । २०७४ को चुनावमा एमालेले जितेको काठमाडौं महानगरपालिकामा भने स्वतन्त्र उम्मेदवार बालेन्द्र साह अगाडि छन् ।

२,६०१ मत सहित अग्रता लिइरहेका बालेन्द्रलाई एमालेका केशव स्थापितले १,४१५ मतसहित पछ्याइरहेका छन् । २०७४ मा एमालेका विद्यासुन्दर शाक्यले ६४ हजार ९१३ मत ल्याएर जितेका थिए ।

बाँकी १० मध्ये एमालेले कागेश्वरी-मनोहरा, गोकर्णेश्वर, चन्द्रागिरि, टोखा, तारकेश्वर, बुढानीलकण्ठ र शंखरापुर नगरपालिकामा एमालेको अग्रता छ ।

शंखरापुरमा एमालेका कृष्णलाल बजगाईंले १,३०२ मत ल्याउँदा माओवादी केन्द्रका लक्ष्मीप्रसाद श्रेष्ठले १,१८० मतसहित पछ्याइरहेका छन् । अघिल्लो पटक यो नगरपालिकामा एमालेका सुवर्ण श्रेष्ठले जितेका थिए । उनले ४,८६९ मत ल्याएर मेयर जित्दा कांग्रेसका शंकर तिवारीले २,९४७ मत ल्याएका थिए ।

बुढानीलकण्ठमा एमालेका मिठाराम अधिकारीले अग्रता लिइरहेका छन् । अधिकारीले २,०५८ मत ल्याएर अग्रता लिइरहँदा कांग्रेसका विनोद चालिसेले १,७४० मत ल्याएका छन् । २०७४ मा पनि यो नगरपालिका एमालेले नै जितेको थियो । त्यसबेला एमालेका उद्धवप्रसाद खरेलले १३ हजार २४६ मत ल्याएर मेयर जित्दा कांग्रेसका राजु श्रेष्ठले ८,९२७ मत ल्याएका थिए ।

तारकेश्वर नगरपालिकामा एमालेका रामेश्वर बोहराले अग्रता लिइरहेका छन् । उनले २,०८७ मत ल्याएका छन् भने कांग्रेसका हरिकृष्ण महर्जनले १,७०७ मत ल्याएका छन् । २०७४ को चुनावमा पनि एमालेबाट बोहराले मेयर जितेका थिए । उनले ९,३२६ मत ल्याएर मेयर जित्दा कांग्रेसका श्रीराम थापाले ७,७५७ मत ल्याएका थिए ।

गोकर्णेश्वर नगरपालिकामा एमालेका उद्धव बिष्टले १,८०२ मत सहित अग्रता लिइरहेका छन् । उनलाई कांग्रेसका दीपककुमार रिसालले १,५२७ मत सहित पछ्याइरहेका छन् । २०७४ को चुनावमा भने यो नगरपालिकामा कांग्रेसले जितेको थियो । कांग्रेसका सन्तोष चालिसेले ९,००९ मत ल्याएर मेयर जित्दा एमालेका पुष्पप्रसाद चौलागाईंले ७,५९५ मत ल्याएका थिए ।

चन्द्रागिरि नगरपालिकामा पनि एमालेकै उत्तमबहादुर राउतले अग्रता बनाइरहेका छन् । उनले १,०२३ मत ल्याउँदा कांग्रेसका घनश्याम गिरीले ८५२ मत ल्याएका छन् । गिरी निवर्तमान मेयर हुन् । २०७४ को चुनावमा गिरीले १३,३०९ मत ल्याएर मेयर जित्दा एमालेका प्रल्हादबहादुर कार्कीले १० हजार ४२१ मत ल्याएका थिए ।

टोखा नगरपालिकामा पनि एमालेकै प्रकाश अधिकारीले १,४०२ मत ल्याएर अग्रता बनाएका छन् । उनलाई कांग्रेसका रजनी थापाले १,१२१ मत ल्याएर पछ्याइरहेका छन् । २०७४ को चुनावमा पनि यो नगरपालिकामा एमालेका अधिकारी नै विजयी भएका थिए । उनले ८,८९५ मत ल्याउँदा कांग्रेसका हरिहर अधिकारीले ७,५१४ मत ल्याएका थिए ।

कागेश्वरी मनोहरामा एमालेका रामशरण ढुंगानाले १,६४८ मत सहित अग्रता बनाइरहेका छन् । उनलाई कांग्रेसका उपेन्द्र कार्कीले १,५४५ मत सहित पछ्याइरहेका छन् । २०७४ को चुनावमा यहाँ एमालेकै कृष्णहरि थापाले जितेका थिए । थापाले ८,९६९ मत ल्याउँदा कांग्रेसका उपेन्द्र कार्कीले ८,४८७ मत ल्याएका थिए ।

कीर्तिपुर, नागार्जुन र दक्षिणकालीमा भने कांग्रेसको अग्रता छ । दक्षिणकालीमा कांग्रेसबाट निवर्तमान मेयर मोहन बस्नेत नै चुनावी मैदानमा छन् । उनले २,९४९ मत सहित अग्रता बनाइरहँदा एमालेका श्रीराम आचार्यले २,२२७ मत सहित पछ्याइरहेका छन् । २०७४ को चुनावमा कांग्रेसबाट बस्नेतले ४,६९८ मत ल्याएर मेयर जित्दा एमालेकी शशी शर्मा अर्यालले ४,२६८ मत ल्याएकी थिइन् ।

नागार्जुनमा पनि कांग्रेसबाट निवर्तमान मेयर मोहनबहादुर बस्नेतले २८७ मत ल्याएर अग्रता बनाएका छन् । उनलाई एमालेका नन्दनहरि गौतमले १८९ मतसहित पछ्याइरहेका छन् । २०७४ मा बस्नेतले ६,९६१ मतसहित मेयर जित्दा एमालेका कृष्णहरि खत्रीले ६,७२६ मत ल्याएका थिए ।

२०७४ को चुनाव एमालेले जितेको कीर्तिपुरमा यसपटक कांग्रेसले अग्रता बनाइरहेको छ । कांग्रेसका राजकुमार नकर्मीले २,६२० मतसहित अग्रता बनाउँदा एमालेबाट केशरत्न बज्राचार्यले १,६०५ मतसहित पछ्याइरहेका छन् । कांग्रेसका नकर्मी २०७४ मा पनि उम्मेदवार थिए ।

तर उनले ६,६१६ मत ल्याउँदा एमालेका रमेश महर्जनले ७,३६० मत ल्याएर मेयर जितेका थिए ।

यो खबर पढेर तपाईलाई कस्तो महसुस भयो ?
शेयर गर्नुहोस:
Share on facebook
Share on twitter
Share on linkedin
Share on whatsapp
Share on pinterest
Share on telegram
Share on email
Share on pinterest
Share on reddit
Share on skype
प्रतिक्रिया दिनुहोस

Discussion about this post

सम्बन्धित समाचार

Related Posts

ट्रेन्डिङ
भर्खरै प्रकाशित