त्रिभुवन अन्तर्राष्ट्रिय विमानस्थलबाट भएको १४ किलो सुन तस्करी प्रकरणका सम्बन्धमा गठित छानिबन समितिले आफ्नो प्रतिवेदन सार्वजनिक गरेको छ ।
१४ किलो सुनसहित त्रिभुवन विमानस्थलबाट पक्राउ परेका गोरखाका मीनबहादुर घले र चन्द्र घलेले पटक-पटक गरी अहिलेसम्म १३८ किलो सुन अवैध तरिकाले भित्र्याएको खुलेको छ।
विमानस्थलबाट मंसिर २२ गते बरामद गरेको १४ किलो सुनबारे अनुसन्धान गर्न विमानस्थल भन्सार कार्यालयका प्रमुख भन्सार अधिकृत मणिराम पौडेलको संयोजकत्वमा गठित ६ सदस्यीय छानबिन समितिले अनुसन्धानका क्रममा १३८ किलो सुन त्यसैगरी भित्रिएको पत्ता लगाएको हो।
जसअनुसार सीसीटीभी फुटेज एनालाइसिसका साथै फोनदेखि सामाजिक सञ्जालका मेसेन्जहरुको सम्पूर्ण डिटेलहरू समितिले अध्ययन गरेको थियो । यस्तै मोबाइल, स्थलगत अनुसन्धानमा रेकर्ड गरिएका भिडियो एवम् अन्य आवश्यक वस्तुहरुलाई पनि आरोपीहरूको लिखित बयानमा सनाखत गरिएको थियो ।
यसरी सुन ल्याउन मीनबहादुर र चन्द्र घलेसँगै स्याङ्जाका कृष्ण कुमार श्रेष्ठ पनि संलग्न थिए।
त्यसरी ल्याइने सुन त्रिभुवन अन्तर्राष्ट्रिय विमानस्थलमा सफाइ, शौचालय, प्लम्बर, एसी लगायतमा सफाइ र मर्मतको काम गर्नेहरूले भन्सार चेकजाँच छलेर सुन बाहिर निकाल्ने गरिएको अनुसन्धान प्रतिवेदनमा उल्लेख छ।
रमेश देउला, राधाकृष्ण श्रेष्ठ, अनिल श्रेष्ठ, लेक बहादुर तामाङ र शेरबहादुर बस्नेत लगायतका विमानस्थलमा सफाइदेखि शौचालयमा काम गर्ने जिम्मेवारी पाएकाहरूले सुनलाई चेकजाँच छलाएर बाहिर पुर्याउँथे।
त्यसरी बाहिर पुगेपछि चन्द्र बहादुर घलेले सुन सम्बन्धित व्यक्तिलाई दिने गरेको अनुसन्धानबाट खुलेको छ।
मंसिर २२ गते सुन लिएर दुबईबाट आएका चन्द्र घलेले सेतो स्टकोटमा सातवटा गोजी बनाएर २/२ किलोका बिस्कुट आकारका ७ वटा सुन ल्याएका थिए।
Discussion about this post