साफ च्याम्पियनसीपको १३ औं संस्करणको उपाधिका लागि आज नेपाल र भारतबीच फाइनल भिडन्त हुँदैछ । नेपाल पहिलोपटक यस प्रतियोगिताको फाइनलमा पुगेको हो भने भारत ७ पटकको उपाधि विजेता हो ।

१३औं साफ सुरू हुनै लाग्दा कुवेतका ‘प्रो-लाइसेन्स’ प्रशिक्षक अब्दुल्लाह अल्मुताइरीले भनेका थिए, ‘सकेसम्म उपाधि नै जित्ने, नभए कम्तीमा फाइनल भए पनि पुग्ने मेरो लक्ष्य छ।’

उनको यो वाचा पूरा भएको छ। नेपाल साफ च्याम्पियनसिपको २८ वर्षे इतिहासमा पहिलोपटक फाइनल पुगेको छ। उपाधिका लागि शनिबार राति चिरप्रतिद्वन्द्वी भारतसँग आमनेसामने हुँदै छ।

बराबरीमा रोकिएको भारतले पछिल्लो दुई खेलमा जित हासिल गर्दै फाइनलमा स्थान बनाएको हो । नेपालले भने पहिलो दुई खेल जिते पनि तेस्रो खेलमा भारतसित पराजय व्यहोरेको थियो ।

अन्तिम खेलमा बंगलादेशलाई बराबरीमा रोकेपछि नेपाल इतिहास रच्दै फाइनलमा पुगेको छ ।

प्रशिक्षक अल्मुताइरीको नेतृत्वमा नेपाली खेलाडीहरूले यसपटक साफको पहिलो खेलबाटै रवाफ देखाए। नेपालले आयोजक माल्दिभ्सलाई उसैको घरेलु मैदानमा १-० ले पराजित गर्‍यो। ८६औं मिनेटमा मनिष डाँगीले गरेको एक मात्रै गोल जितका लागि पर्याप्त भयो। साफमा सहभागी अन्य चार टिमलाई यो जितको सन्देश थियो- नेपाली टोली पनि जुनसुकै परिस्थितिमा खेल आफ्नो पक्षमा पार्न सक्छ।

यसअघि समूहचरणको खेलमा भारतसँग अति रक्षात्मक खेल्दा नेपालले १-० को हार स्वीकार्न वाध्य भएको थियो । फाइनलमा नेपालले अट्याक र डिफेन्सको सन्तुलन मिलाउनुपर्ने छ ।

साफ च्याम्पियनसीपको उपाधि जितेको खण्डमा नेपालको ऐतिहासिक सफलता हुनेछ । भारतका लागि भने यो नियमितताजस्तै बनिसकेको छ । च्याम्पियनसीपका अघिल्ला १२ संस्करणमध्ये ११ संस्करणमा भारत फाइनलमा पुगेको थियो ।

सन् २००३ को फाइनलमा मात्रै भारतले तेस्रो स्थानमा चित्त बुझाएको थियो । अन्यथा बाँकी सबै संस्करणमा भारत विजेता वा उपविजेता बनेको छ ।

साफ च्याम्पियनसिपको बलियो टोली भारत र नेपालबीचको फाइनल खेल आज राति पौने नौ बजे मालदिभ्सको राजधानी मालेमा हुँदैछ ।

प्रतिक्रिया

सम्बन्धित खवर

ताजा समाचार

लोकप्रिय