अफगानिस्तानको कान्दहार शहरस्थित एउटा शिया मस्जिदमा बम आक्रमण हुँदा ४७ जनाको मृत्यु भएको छ भने ७० जना घाइते भएका छन् ।शुक्रबारको साप्ताहिक प्रार्थनाका बेला बीबी फातिमा मस्जिदमा बम आक्रमण भएको थियो । अलजजिराका अनुसार विष्फोटमा ४७ जनाको मृत्यु भएको पुष्टि भएको छ ।

विस्फोटको कारण हालसम्म स्पष्ट भएको छैन तर आत्मघाती बम हमला भएको हुनसक्ने आशङ्का गरिएको छ । एक प्रत्यक्षदर्शीले एएफपीलाई तीनवटा विस्फोटका आवाजहरू सुनेको बताएका छन् – पहिलो मुख्य द्वारमा, दोस्रो प्रार्थना गर्नेहरूले हात धुने ठाउँमा र अर्को तेस्रो । शुक्रबार प्रार्थना गर्नेहरूको धेरै भीड लाग्ने गर्दछ । विस्फोटको समयमा मस्जिद भरिभराउ रहेको बताइएको छ । एएफपीका पत्रकारका अनुसार घटनास्थलमा कम्तीमा १५ वटा एम्बुलेन्सहरू देखिएका थिए ।

तीन जना आक्रमणकारीले आत्मघाती बम आक्रमण गरेको प्रत्यक्षदर्शीले बताएका छन् । एक जना आक्रमणकारीले मस्जिदको प्रवेशद्वारमा र दुई जनाले भित्र विष्फोट गराएका थिए ।

शुक्रबारको साप्ताहिक प्रार्थना हुने भएकाले मस्जिद मानिसहरुले भरिभराउ थियो । घटनास्थलको तस्वीरमा मस्जिदका झ्यालका सिसाहरु फुटेका र शवहरु भुइँमा यत्रतत्र छरिएको देखिन्छ । तालिबानले विशेष सुरक्षा फौजले घटनास्थल घेरामा राखेको छ र घाइतेहरुको उपचारका लागि रगत आवश्यक परेकाले रक्तदान गर्न आह्वान गरेको छ ।

यो आक्रमणको जिम्मा कसैले पनि लिएको छैन । एक साता अगाडि शुक्रबारकै दिन पनि उत्तरी कुन्दुज प्रान्तस्थित शिया मस्जिदमा विष्फोट हुँदा ५० जनाको ज्यान गएको थियो । सो घटनाको आईएस–केले जिम्मा लिएको थियो ।

 

प्रतिक्रिया

सम्बन्धित खवर

ताजा समाचार

लोकप्रिय