१४ वर्षकी किशोरीलाई बलात्कार प्रयास गरेको आरोप लागेका मकवानपुरको कैलाश गाउँपालिका वडा नम्बर ९ का वडाध्यक्ष भुवन सिंह घलानलाई प्रहरीले नियन्त्रणमा लिएको छ ।

वडाध्यक्ष घलानलाई हेटौँडाबाट नियन्त्रणमा लिएको जिल्ला प्रहरी कार्यालय मकवानपुरका प्रवक्ता टेकबहादुर कार्कीले जानकारी दिए । प्रवक्ता कार्की अनुसार घलान आफै प्रहरी कार्यालयमा आएका हुन् ।

घलान विरुद्ध कैलाश-९ को कालिका माविकी १४ वर्षीया छात्रा विद्यार्थीले बलात्कार प्रयासको जाहेरी दिएपछि जिल्ला अदालत मकवानपुरबाट सोमबार पक्राउ पुर्जी जारी भएको थियो ।

मकवानपुर प्रहरी प्रमुख प्रहरी उपरीक्षक सुरेन्द्र गुरुङले वडाध्यक्ष घलानलाई पक्राउ गरेको जानकारी दिए । शुक्रबार जिल्ला अदालत मकवानपुरले उनीविरुद्ध पक्राउ पूर्जी जारी गरेको थियो ।

पीडित विद्यार्थीको तर्फबाट शुक्रबार जिल्ला प्रहरी कार्यालयमा उजुरी परेको थियो ।

हेटौँडा-१ जरुवा टोल स्थित असन गेस्ट हाउसको तेस्रो तलामा १९ गते राति १२ : ३० बजेको समयमा वडाध्यक्षले आफूलाई बलात्कारको प्रयास गर्ने उद्देश्यले शरीरको संवेदनशील अङ्गहरूमा सुमसुम्याएको जाहेरीमा उल्लेख गरेकी छिन ।