सार्वजनिक जग्गा आफ्ना नाममा दर्ता गराई भ्रष्टाचार गरेको आरोपमा अख्तियार दुरुपयोग अनुसन्धान आयोगले राजपरिवारका ज्वाइँ कुमार खड्गविक्रम शाह लगायतविरुद्ध भ्रष्टाचार मुद्दा दायर गरेको छ ।धनुषाको पिडारी चोकस्थित र रत्नसागर मन्दिरको जग्गा व्यक्तिको नाममा गराएको आरोपमा ३१ जनाविरुद्ध भ्रष्टाचार मुद्दा दायर गरिएको छ । अख्तियार दुरुपयोग अनुसन्धान आयोगले उनीहरूविरुद्ध विशेष अदालतमा मुद्दा दायर गरेको हो ।अख्तियारको दावी अनुसार, जनकपुरस्थित गुठी तहसिल तथा खर्च कार्यालयले उक्त जग्गा गुठीको लगत कायम गरिदिएपछि भ्रष्टाचारको सुरूवात भएको हो । उक्त सार्वजनिक जग्गा कुनै गुठीको नाममा थिएन ।

आयोगले जारी गरेको विज्ञप्तिअनुसार मुद्दा दायर गरिएकामा तत्कालीन जनकपुर गुठी तहसिल तथा खर्च कार्यालयका तत्कालीन कार्यालय प्रमुख मधुप्रसाद बस्ताकोटी, धनुषा मालपोतका तत्कालीन नायब सुब्बा यमुनाप्रसाद पंजियार, खरिदार जगदेव कामती र काठमाडौं शारदासदन कमलादीका कुमार खड्ग विक्रम शाह छन् । उनीहरूसँग जनही २९ करोड ८८ लाख ८१ हजार ४३७ रूपैयाँ बिगो दाबी गरिएको छ ।

धनुषा साविक पिडारी ५ स्थित मन्दिरको कित्ता नम्बर १३२, १३३, १३४, १३५ र ६ को ८ विघा १० कठ्ठा १२ धुर सार्वजनिक जग्गा आफ्नो नाममा पारेर भ्रष्टचार गरेको आयोगको ठहर छ ।सँगै मालपोत कार्यालयका कर्मचारीलाई प्रलोभनमा पारी उक्त सार्वजनिक जग्गाबाट नामसारी तथा रजिष्ट्रेसन पास भई कित्ताकाट गरी हाल कायम जग्गाका २७ जना जग्गाधनीहरूलाई पनि विपक्षी बनाइएको आयोगका प्रवक्ता श्यामप्रसाद भण्डारीले बताएका छन् । निजहरूबाट पुनः सरकारका नाममा कायम गराउन मागदाबी गरिएको छ ।