बाँकेको नेपालगन्ज उपमहानगरपालिका वडा नं. १० भृकुटीनगर जनस्वास्थ्य कार्यालय नजिकै एउटा घरमा विस्फाेट हुँदा दुई जना घाइते भएका छन् । विस्फाेटमा विप्लव नेतृत्वको नेकपाका कार्यकता डिल्ली बिसीसहित दुई जना घाइते भएका छन् ।

घटनास्थलमा थप बम हुन सक्ने आशंकामा ठूलो संख्यामा प्रहरी परिचालन हुनुका साथै नेपाली सेनाको बम डिस्पोजल टोली घटनास्थलमा पुगेको थियो । स्थानीयले अर्को बम देखिएको र डिस्पोजका लागि सेना आएको बताएका छन् । वुधबार साँझको समयमा स्थानीय दिवाकरविक्रम मल्लको घरमा सो घटना भएको हो ।

उनकाअनुसार कोठाभित्र बम बनाउँदै गर्दा प्रहरीले थाहा पाएपछि हतपत भाग्न खोज्दा प्रेसर कुकर बम विष्फोट भएको थियो। सो क्रममा क्षेत्री र धर्म बडुवाल घाइते भएका छन्। बडुवालको अवस्था गम्भीर रहेको प्रहरीले जनाएको छ।

प्रहरीका अनुसार सो घटनामा २ जनालाई पक्राउ गरिएको छ । विस्फोटपछि थप दुई कुकर बम पनि फेला परेका छन् । स्थानीयका अनुसार केहीसमय यता सो घरमा विप्लव निकट कार्यकर्ता बस्दै आएका थिए ।

निर्वाचन बहिष्कार घोषणा गरेका सो पार्टीले मंगलबार पनि चुनाव विथोल्ने घोषणा गरेको थियो । नेता प्रकाण्डले चुनाव जनताका लागि नभएकोले जसरी पनि बहिष्कार गर्न नेता कार्यकर्तालाई बुटवलमा निर्देशन गरेका थिए ।