संस्कृति,पर्यटन तथा नागरिक उड्यनमन्त्री सुदन किराँतीले सुरु गरेको तीन महिने पशुपति सरसफाइ अभियान अन्तर्गत आज पनि सरसफाइ गरिएको छ । ‘स्वच्छ पशुपति, सफा पशुपति र हराभरा पशुपति’ भन्ने मूल नारासहित सुरु गरिएको यस अभियानमा नेपाल वायुसेवा निगमले पनि साथ दिएको छ । अभियान अन्तर्गत वायुसेवा निगमले पाशुपत क्षेत्रमा वृक्षारोपण गरेको हो । आजको वृक्षारोपण कार्यक्रममा मन्त्री सुदन किराँती सहित निगमका कर्मचारीको उपस्थिति थियो । अभियानमा मन्त्रालय मातहतका सम्पूर्ण कर्मचारी, अभियन्ता, नागरिक समाज,  सञ्चार कर्मी लगायतको समेत सहभागिता थियो । वायुसेवा निगमले पनि सफाइ अभियानमा निरन्तर सहभागिता जनाउँदै आइरहेको छ । हिन्दुहरूको आस्थाको केन्द्र पवित्र पाशुपत क्षेत्रलाई सफा, स्वच्छ र हराभरा बनाउने उद्देश्यले संस्कृति पर्यटन तथा नागरिक उड्डयन मन्त्रालयले हरेक शनिवार सरसफाइ अभियान सञ्चालन गर्दै आएको छ ।