राष्ट्रिय प्रजातन्त्र पार्टीले मापदण्डविपरीत बनेको आफ्नो कार्यालय भवन तीन हप्ताभित्र खाली गर्ने लिखित प्रतिवद्धता जनाएको छ । काठमाडौं जिल्ला प्रशासन कार्यालयमा भएको त्रिपक्षीय छलफलपछि राप्रपाले सो प्रतिवद्धता जनाएको हो ।

काठमाडौं महानगरपालिकाका सहायक प्रवक्ता दिपक अधिकारीका अनुसार राप्रपा भवन भत्काउने विषयमा जिल्ला प्रशासन प्रमुखको रोहबरमा काठमाडौं महानगर र राप्रपाबीच छलफल भएको थियो । छलफलमा समझदारीपछि राप्रपाका मुख्यसचिव केदारबहादुर अधिकारीले तीन हप्ताभित्र कार्यालय खाली गर्ने प्रतिवद्धतासहितको पत्रमा हस्ताक्षर गरेर प्रजिअको भाइबरमा पठाएका छन् । उक्त पत्र नगर प्रहरी प्रमुख राजू पाण्डेले समेत हेरेर सहमति जनाएका थिए ।

जिप्रकामा सहमति पश्चात महानगरले पठाएको डोजर फर्किएको छ । तीन हप्तापछि पनि घर खाली नगरेमा महानगरले डोजर चलाउने छ ।