नेपाल समाजवादी पार्टी (नेसपा) का अध्यक्ष बाबुराम भट्टराईले नेकपा (माओवादी केन्द्र) का अध्यक्षसमेत रहेका प्रधानमन्त्री पुष्पकमल दाहाल ‘प्रचण्ड’ ले जितेको क्षेत्र गोरखा २ बाट राजीनामा दिनु उपयुक्त हुने टिप्पणी गरेका छन्।‘प्रचण्डजीले चुनावपूर्वको गठबन्धनलाई अर्को निर्वाचनभन्दा पहिले छोड्नु त राजनीति र नैतिक हिसाबले उपयुक्त हुँदैन । उहाँले त्यसलाई परिवर्तन गर्ने हो भने जसको सहयोगमा उहाँले निर्वाचन जित्नुभएको छ’, बिहीबार गोरखा पुगेका अध्यक्ष भट्टराईले भने, ‘तीनिहरूलाई त धोका दिएको ठहर्छ । त्यस्तो स्थितिमा उहाँले जितेको निर्वाचन क्षेत्रबाट राजीनामा दिनु र फेरि नयाँ निर्वाचन गर्नु उपयुक्त हुन्छ ।’

आफू सांसद नहुँदा पनि निर्वाचन क्षेत्र र गोरखा कम्तीमा महिनामा एक पटक आउने गरेको उनले बताए। गोरखा २ मा फेरि चुनाव उठ्ने तयारी हो भन्ने प्रश्नमा जबाफ दिएका भट्टराईले भने, ‘म आफैँ उठ्छु भनेको छैन, तर सधैं चुनाव उठ्दिनँ पनि भनेको छैन। यो त भोलिका परिस्थितिमा निर्भर रहने कुरा हो।’