सप्तरी–सप्तरीको हनुमाननगर कंकालिनी नगरपालिकाको नगरप्रमुखमा जनमत पार्टी तथा उपप्रमुखमा जनता समाजवादी पार्टी  (जसपा) विजयी भएका छन्। प्रमुखमा जनमतका वीरेन्द्र माझी र उपप्रमुखमा समाजवादीकी सरितादेवी यादव निर्वाचित भएका हुन्। निर्वाचन अधिकृतको कार्यालयका अनुसार माझीले ६ हजार ४०७ तथा उनका निकटतम प्रतिद्वन्द्वी समाजवादीका शैलेशकुमार साहले ६ हजार २४६ मत प्राप्त गरे। साह निवर्तमान नगरप्रमुख हुन्। उपप्रमुखमा जसपाकी यादवले ६ हजार ५१२ मत प्राप्त गरी विजयी भइन्। उनका निकटतम प्रतिद्वन्द्वी जनमत पार्टीकी रेखादेवी मण्डलले पाँच हजार ९८२ मत प्राप्त गरिन्।