काठमाडौं महानगरपालिकाले एयरपोर्ट सिनामंगल क्षेत्रमा रूख कटान गरेको छ। आज बिहान महानगरबाट खटिएको टोलीले जोखिमयुक्त रूख कटान गरेका हुन्। बिजुलीका तार अवरोध गर्ने रूख र हाँगा कटान गरिएको महानगरले जानकारी दिएको छ। नगर प्रहरी निरीक्षक प्रकाश पण्डितले जोखिमयुक्त रूख कटान गरिएको बताए। ‘वडा र विद्युत प्राधिकरणको आग्रहमा जोखिमयुक्त रूख र हाँगा कटान गरिएको छ। जरा कमजोर भएका रूख जुनसुकै बेला ढलेर मानविय र भौतिक क्षति हुन सक्ने भएकोले रूख कटान गर्नुपरेको हो,’ उनले भने। बिजुलीका तारमा रूखका हाँगाले छुँदा अवरोध हुने गरेको पाइएपछि रूख कटान गरिएको हो। कटान गरिएका रूख र हाँगा महानगरको वातावरण विभागले व्यवस्थापन गरेको छ।